陳美齡 美美家園 國際歌迷會 陳美齡歌迷論壇 Agnes Chan アグネス・チャン

 取回密碼
 我要註冊

QQ登錄

只需一步,快速開始

搜尋
檢視: 1056|回覆: 4

[最新資訊] 抗癌五年 陳美齡:最怕睇唔到啲仔大

[複製連結]

3466

主題

1萬

發表

14萬

積分

管理員

Rank: 12Rank: 12Rank: 12

積分
146701
發表於 2014-9-22 06:44 | 顯示全部樓層 |閱讀模式
bkn-20140921080657235-0921_00862_001_01b.jpg
陳美齡七年前確診患上乳腺癌,但癌魔只侵蝕了她的身體,並沒有擊倒她的意志。

長居日本的息影女星陳美齡(Agnes),雖已年過五十,仍保持着童顏與年輕心境,賢淑端莊、恬靜優雅。七年前確診患上乳腺癌,但癌魔只侵蝕了她的身體,並沒有擊倒她的意志。兩年前康復的她,積極推動社會關注癌症。適逢下月為有「粉紅十月」之稱的「國際乳癌關注月」,最近回港為浸會大學講課的Agnes,憶述抗癌心路歷程,講述如何徘徊鬼門關,僥倖檢回一命的人生一課。

2007年,長居日本的息影女星陳美齡(Agnes)確診患上乳腺癌,同年10月接受手術割除右胸腫瘤,並展開長達5年的艱苦治療。7年後的今天,一度徘徊鬼門關、最終僥倖檢回一命的Agnes,以過來人身份推動社會關注癌症。

點解要係我?

回想當年初得悉患上乳腺癌,Agnes也感到難以接受,她說:「記得嗰晚等醫生報告等到好夜,最終都係等唔到就瞓咗覺,原來我先生(金子力)當晚好夜嗰陣同醫生通電話,知道咗我患癌。當我知道自己患癌後,我真係好唔開心,不斷問:『點解係我?我一直以嚟咁健康生活,咁畀心機做嘢,又唔煙唔酒,屋企又冇人患過癌症,點解要係我?』先生見我咁,都有安慰我,佢話:『如果要死,咁個結局係命中注定,但如果唔係命中注定,就即係唔使死,你喊嚟做乜?』我諗佢講嘅嘢都啱。」

Agnes的無奈可以理解,雖然美國作家Florence Williams在《乳房:一段自然與非自然的歷史》(Breasts:A Natural and Unnatural History)中指出「只有約百分之十的乳癌病例有家族病史,大部分罹患此病的女性,都是家族裏罹病的第一人」,但畢竟她當年只是位幸福少奶奶,而非後來的日本抗癌協會大使,驚聞噩耗之下,六神無主,亦屬人之常情。

全家人慌晒

就連Agnes的丈夫金子力也驚惶失措,她說:「我先生一直以來無論遇到咩事都好,佢都好鎮定,直到有一次我見到佢揸車,佢為咗我個病顯得好慌張、好迷惘,我從未見過佢咁慌張,嗰刻我醒覺到原來屋企人為咗我個病比我自己仲慌張,但佢哋慌張之餘又冇嘢可以幫到忙,與其全家喺度慌張,搞到好大件事咁,不如我自己唔好咁慌,咁咪個個都唔慌囉!咁就咩大事都可以變小事,壞事都可以變好事!記得嗰時我好多時朝早起身都好攰、好虛弱,冇辦法做便當畀我啲小朋友,亦都湊唔到佢哋返學,但我先生好好,佢肩負起呢個重責,無論做便當定湊仔,佢都一手包辦。我未病嘅時候,佢間中都有幫吓手,但我病咗嗰段時間,佢做好多好多,我哋屋企雖然有請鐘點女傭,但冇請工人,因為想自己湊番小朋友,咁佢哋都會孝順啲,所以有好多家頭細務都係我哋自己做番。」

發現得遲係會死

大病得愈固然感恩,因為Agnes見證過太多因為癌症而與家人陰陽永隔的故事:「我認識一位30幾歲患乳癌嘅日本女士,佢有一個女,當時仲讀緊幼稚園,30幾歲喺呢個病嚟講算後生,後生嘅人多數以為自己冇病,到發現嗰刻已經太遲,佢嘅癌細胞已經擴散,用咗好多錢去醫,過程好辛苦,當時佢話:『我個女仲細,我唯一希望係想見到個女入小學。我係咪都要死,不如將啲錢留畀個女!』我話:『梗係唔得!仔女係睇住媽媽嘅背脊長大,你要努力、畀心機!』結果個女上咗小學,佢都有出席入學禮,但之後死咗。我同佢講:『媽媽嘅愛已經畀咗佢,你個女一世都用唔晒,唔使擔心。』癌症一定要盡早發現,好似我發現得早,仲可以健康生活,但發現得遲係會死,我好多朋友都係咁樣過身,希望大家要多啲注意,唔好掉以輕心。」

日本掀女權「革命」14歲彈起

陳美齡(Agnes),生於1955年8月20日,祖籍東莞,生於香港。14歲開始唱歌,1971年與姊姊陳依齡灌錄美國歌手Joni Mitchell作曲的《Circle Game》一炮而紅,更參與張徹導演的電影《年輕人》和《叛逆》演出,在香港及東南亞一帶人氣極盛。1972年應邀前往日本發展,成為風靡一時的人氣偶像。其後暫別娛圈,重返校園,1978年畢業後重返日本藝能界。1986年與日籍經理人金子力結婚及產子,翌年攜同長子到電視台等工作,引發日本社會就女性地位問題展開激烈討論,後稱「美齡論爭」。3年後,到美國史丹福大學修讀博士課程,並以日、美兩國男女待遇為題撰寫論文。

身兼歌手、演員、作家、大學教授等多個不同身份的Agnes,至今仍為社會上的婦女及兒童工作積極努力,她說:「世上仲有好多小朋友仍然處於痛苦、戰爭、天災當中,我希望世界和平,小朋友唔好再受苦,我知呢個願望好難實現,但希望改善到少少都好,算係我對社會嘅一種貢獻,今後我會繼續努力!」正如《Circle Game》中的那個小孩,Agnes繼續為夢想進發!

手術後自己睇自己有啲唔慣

正如Agnes早年一首歌曲《嫁裳》中的歌詞:「從今後家事有我照料,請放心不必煩惱」,Agnes獲得丈夫貼心支持,可以安心養病了,可是乳癌關係到乳房健康,直接引伸出女性對自身形象的考慮,乳房對女人的重要性,除了內地有本圍繞乳腺癌為題的著作《乳房好女人才好》外,網絡上甚至有人這樣認為:「乳房之於女人,是達到一種優雅性感至美境地之關鍵,它形狀的好壞,直接影響到女人成為美人的信心。」究竟Agnes有否擔心過身材會因為乳癌而大變?

外表睇唔出

她說:「我冇去諗,當時我最擔心嘅係怕睇唔到啲仔大,嗰時大仔讀緊大學,二仔讀緊中學,細仔仲讀緊小學,我覺得做媽媽至少應該睇到個仔中學畢業,小學階段始終仲係太細個。就算後來我接受手術割咗,都只會係自己睇自己會有啲唔習慣,會覺得怪,但我唔講,外表睇唔出,亦都冇人知我割咗。世事其實都係好相似,好多時都係人哋根本就唔會緊張嗰件事,係你自己一個人覺得好緊張,就以為好大件事啫!」

嘆電療難捱

對意志堅定的Agnes來說,乳癌只侵蝕了她的軀殼,並沒有打擊她的意志,即使最痛苦難捱的5年治療期,她都一樣有方法跨過:「做完手術後,做咗好多電療同賀爾蒙治療,好辛苦,影響到個人變得脾氣好差,關節又出毛病,面又浮浮腫腫,得病前我一年有百幾場音樂會同演出,口腫面腫點見人?醫生話呢種辛苦我仲要捱多5年,點捱呀?為咗鼓勵自己,我買咗5隻手鈪戴晒上手,每過一年除一隻,當捱得辛苦時,就望吓啲手鈪,有個目標去努力:『仲有4年、3年、2年!』到咗第5年,我將最後一隻手鈪除低,成家人去夏威夷旅行,我喺佢哋見證下將5隻手鈪拋晒落海,同病魔講拜拜,然後一家人開心咁慶祝!『Yeah !我冇事喇!』」

同病相憐

已康復的Agnes,有幾句說話想勉勵尚在與癌魔搏鬥的病友:「好多患病嘅朋友會因為接受治療變得有脾氣、瞓唔着、身體弱,或者會令屋企人覺得難受,可以嘗試同佢哋解釋番:『依家呢個我,唔係真正嘅我,完成治療之後,真正嘅我就會返番嚟!』盡量同屋企保持良好關係。至於朋友方面,就算幾好朋友都唔會明白,因為佢哋未體驗過,所以應該交番啲病友嚟互相支持,病友對我有好大嘅鼓勵,我係日本抗癌協會大使,識得好多患者同家屬,我哋之間唔使多講都會互相明白、互相支持!」

bkn-20140921080657235-0921_00862_001_02b.jpg
病愈的陳美齡積極人生,希望幫到更多人!

bkn-20140921080657235-0921_00862_001_03b.jpg
陳美齡與金子力育有三名兒子,能夠看着兒子長大,是做媽媽最幸福的事!

bkn-20140921080657235-0921_00862_001_09b.jpg
陳美齡表示癌症發現得早是可以治療的。

bkn-20140921080657235-0921_00862_001_10b.jpg
陳美齡鼓勵其他病患者要與家人盡量保持良好關係,與病友之間要互相支持。

http://hk.on.cc/hk/bkn/cnt/entertainment/20140921/bkn-20140921080657235-0921_00862_001.html

43

主題

963

發表

1萬

積分

資深會員

Rank: 5Rank: 5

積分
10629
發表於 2014-9-22 20:19 | 顯示全部樓層
看這照片還有一鼓少女氣息 ! ^^

37

主題

4542

發表

1萬

積分

版主

Rank: 8Rank: 8

積分
19693
發表於 2014-9-25 21:51 | 顯示全部樓層
moneyismymoney 發表於 2014-9-22 20:19
看這照片還有一鼓少女氣息 ! ^^

美龄确实有一股少女氣息 ! ^^

0

主題

156

發表

407

積分

中級會員

Rank: 3Rank: 3

積分
407
發表於 2014-9-26 18:41 | 顯示全部樓層
勇敢,美美看起来好年轻哦

1

主題

83

發表

138

積分

中級會員

Rank: 3Rank: 3

積分
138
發表於 2014-10-24 08:04 | 顯示全部樓層
眼神里透出的永远有一股童真,似乎能让人看到纯洁的内心。
你需要登入後才可以回覆 登入 | 我要註冊

本版積分規則

陳美齡國際歌迷會

GMT+8, 2019-10-19 23:16

Powered by Discuz! X3.4

© 2009-2019 AgnesChan.net

快速回覆 返回頂端 返回清單